Wintersonnwend

Grod´ a poar Dog vor Heilig Nacht

is Sonnwend… – Gott sei Dank -

Sie hat si´ aufn Weg  iatz gmacht!

Mia war´n scho  nervnkrank…

Weil: Wann`s um viere finster is,

und des glei sechzehn Stund,

na fühlt ma  si  a wengal mies,

da Mensch und aa da Hund…

De Dog werdn endlich länger – gej?

An Neijoahr kennst as scho…

A ganze Stund an Liachtmess! – Mei,

Do bin i wirkli froh!

Naa, naa! – Bis richtig hoaß wer´n duad,

vageht no  a hoibs Joahr…

I  find des Schifoahrn scho  recht guat,

und frei  mi  drauf sogoar!

Und san de Dog dann hell und lang

und `s Früahjoar kimmt scho boid,

na san mia volla Schaffnsdrang,

do gfreit si Jung und Oid…