Irene Laubner
De Weihnachtsbaam
Er is so manches Johr gewachs beim Vojelsheisje
im Gaade, hot gekennt de Spatz, die Amsel, s'Meisje;
bis's eenes Daachs gehääscht hot - das muss so langsam werre! -:
"Wenn der noch greeßer werd, duut er de Weg vesperre!
Die Dann sitzt nit so ginschtich, mä werrn se neegscht Johr fälle,
um se als Weihnachtsbaam dann in die Stubb se stelle." -
Manchmol hot mä se kritisch betracht: "Scheen is'se jo nit,
so kahl im owwre Drittel, eenseitich in de Mitt.
Na ja, mä muss beim Schmicke die Fehler bisje decke,
vielleicht e kleene Ascht aach noch dezwische stecke." -
Zwä Daach vor Weihnacht hot se de Vadder abgeholzt
un langsam, stets un kritisch beschnätt, geseet, bebolzt. --
Es war e hart Stick Aarwet - es word em eng un waarm -
hot gar im Wald paar Äscht noch gehol vor d' Weihnachtsbaam!
Jetz steht er in de Stubb drin - e Prachtstick der Nadur!
- Dass n e i n Äscht ingesetzt sin, das wääss de Vadder nur!
- 's werd hoffendlich das Eene un Anner nit dran ziehn
un dann am End de Baam noch wie er gewachs war siehn!
E bisje kinchtlich Mixe is um die Zeit jo in
un deshalb guckt mer besser nit ganz so dief eninn!
Irene Laubner
Die Rechte und die Verantwortlichkeit für diesen Beitrag liegen beim Autor (Irene Laubner).
Der Beitrag wurde von Irene Laubner auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 17.12.2013.
- Infos zum Urheberrecht / Haftungsausschluss (Disclaimer).