Verkündigung

I hob iatz in da Bibl g´schaut,

wia`s domois war in Nazareth:

D`Maria war an Sepp sei Braut

und sie war grod beim Nachtgebet…

Do kimmt a Engl – hell is wor(d)n –

ins Kammerl, hot a wengal `knickst,

und gsogt: „Maria, kriag koan Zorn,

i mecht ned, dass Du iatz daschrickst!

Du soisst für Gott a Kindal kriagn

- da Josef hat damit nix z`toa –

den brauchst aa goar ned o zum liagn,

bei Dir geht`s desmoi vo´ alloa:

Da heilig´ Geist kimmt über Di !

Da Bua soi Jesus hoaßn dann…“

D`Maria moant: - “Ja – sakradie –

für`n Hergott dua i`s, wenn i kann !“

Hob`s glesn und hob denkt: - Oh, je –

vom heiling Geist! - I sog`s ganz frei –

ganz ohne Mann - wia soitt des geh?

- Drum muass  a Wunder gwesn sei!“

P.U. 30.11.09